ភ្នំពេញ៖ មន្ត្រីនគរបាលរដ្ឋបាលទឹកថ្លាលោកអនុសេនីយ៍ឯក ម៉ិច មាស ត្រូវបានស្នងការដ្ឋាននគរបាលរាជធានីភ្នំពេញហៅមកសួរនាំក្រោយពីបានបង្ហោះលើបណ្ដាញសង្គម Tik Tok ជាមួយខ្លឹមសារទិញលក់ផ្លាកចេញចូលអគ្គស្នងការនគរបាលជាតិ។ ក្រោយពីសួរនាំមន្ត្រីរូបនោះបញ្ជាក់ថា «គ្រាន់តែផុសអួតប៉ុណ្ណោះ»។

យោងតាមការចុះផ្សាយថ្ងៃទី២៦ ខែធ្នូ ឆ្នាំ២០២២នេះ ស្នងការដ្ឋាននគរបាលរាជធានីភ្នំពេញឱ្យដឹងថា លោកអនុសេនីយ៍ឯក ម៉ិច មាស បានសារភាពថារូបលោក ពិតជាបានបង្ហោះខ្លឹមសារខាងលើពិតប្រាកដមែន តែពុំមានចេតនាក្នុងការលក់ដូរអ្វីឡើយ គោលបំណងគឺផុសអួតដល់មិត្តភ័ក្ត្រដែលជាកងកម្លាំងដូចគ្នាតែប៉ុណ្ណោះ ។

ក្រោយមកសមត្ថកិច្ចនៃអធិការដ្ឋាននគរបាលខណ្ឌសែនសុខ បានធ្វើការណែនាំអប់រំ ធ្វើកិច្ចសន្យា និងដាក់វិន័យរដ្ឋបាល ដោយសម្រេចចេញលិខិតព្រមានដោយផ្អាកការងារ និងដកមកបញ្ឈរជើងរយៈពេល ៣ខែ ហើយត្រូវបង្ហាញមុខនៅផ្នែករដ្ឋបាល នៃអធិការដ្ឋាននគរបាលខណ្ឌសែនសុខជារៀលរាល់ថ្ងៃ៕